點解我仲未嫁得出既?????

近日，胡太病左，病得好重個隻，其實，胡太系一個極度捱得既人，唔系話好病好病，佢都會繼續煮飯。但當佢病到唔願郁既話，真系好病架啦﹗

所以尼兩日我足不出戶咁照顧佢，除左煲粥比佢食、定時定候餵佢食藥之外，仲要照顧埋亞大胡生既三餐，(好彩個隻嘢唔番) 其實好老實講，PP我真系好耐都冇日日夜夜留系屋企啦﹗仲要去街巿買餸，煮飯、洗碗，嘩﹗成個人賢妻晒。連我亞媽都感到唔系幾好意思，因為從來都人咁貼身照顧佢架﹗

當我尋晚食完飯，洗緊碗既時候系度諗，我又入得廚房，又出得廳堂，又孝順老人家，但點解.... 我仲未嫁得出既呢???????????????????? 唉﹗真系令人費解﹗

PS：希望亞胡太快D好番啦﹗

魔鏡魔鏡，邊個系最靚？

我屋企有一塊魔鏡，我稱佢謂魔鏡，系因為佢真系可以照到個樣靚D架。

尼塊魔鏡系座落系我家既公廁，每一次出街之前，我都會入一入去照一照先出門口，除左睇吓個樣有冇咩問題之外，最重要系....照一照，令自己出街既心情開心D。=) 自信心都高D呀﹗hehe﹗

其實我發現左好耐架啦﹗但我一直以為系自己有自戀狂，覺得自己比尼塊魔鏡照一照，自己特別靚。所以一直都唔敢話比人知，直至前一排，系亞媽面前講開裝修，我話將來裝修，都要保留番尼塊鏡，亞媽問點解，我解說左比佢聽之後，佢竟然都承認塊鏡系可以照得人靚D架﹗Hahah!! (唔通亞胡太都有自戀症既？) =P

PS：各位朋友，下次到我家作客時，不妨入一入去我家個洗手間望一望我塊魔鏡，睇吓你個豬樣系咪靚左呀﹗=)

害怕失去你

愛情下，每人都是公平的

喊足一星期

近日攪新公司既野，攪到我好唔開心，我差唔多晚晚都喊﹗好多不如意既事發生﹗真系令我好沮喪，覺得自己好冇用咁﹗好唔鐘意尼種感覺。上星期五同老細傾電話，竟然比佢話番我，話我要求太高，比太大壓力自己﹗唉........ 原來系自己問題，系咩？

所以星期六日，放左自己假，唔准自己check email，唔准開blackberry，唔可以諗公司野﹗依家.... 開心番dd啦﹗唔知.... 聽日會點尼？又喊過？..... =(

近期最愛

上年5月去上海探契女既時候，發現左一樣好好味既食物，佢就系Nutella朱古力醬啦﹗
其實尼隻朱古力醬已經有好多年歷史架啦﹗但系以前一直都唔覺得佢好味，覺得佢好甜，而且我唔系好鐘意用佢尼搽面包，所以一直都冇食佢。直到系契女屋企住既時候，佢亞媽---即我好朋友將尼罐朱古力醬放入雪櫃，雪凍左之後"筆"尼食，原來系好好味架﹗又唔系勁甜，啱啱好﹗超正﹗本想番尼香港之後立即買罐番尼食，但由於去完個多月既旅行之後暴肥，所以將尼樣野pend左。直到今日，好想食好想食，所以買左番屋企，不得了，肥死。

大家不妨試試呀﹗真系好好味架﹗=)

我唔想去第二度，我想留系香港﹗

我好攰，好想放假
我好辛苦，好想休息

2006回顧

好耐冇寫Blog啦﹗上次寫左一篇，但系最後竟然錯手delete左激死我，加上近日成日都唔系香港，都唔可以成日connect to internet，所以好少寫，真系要同D讀者Say個sorry﹗

今日系2007年1月1日，突然間好想回顧一吓我既2006年。

識得我既朋友都知，我胡x瑩，系一個超級工作狂，一有嘢做，就連自己叫咩名都唔記得，但系舊年對我尼講，可以話系一個超級唔productive既一年，a terrible mess，系4月離開左史提分公司之後，自己放自己假，足足放左3個月，之後去左一間cosmetics公司做，做左一個月又轉，轉左去萬寧，做左2個半月，又休息左3個星期，就遇到一個機會，一個我估都估唔到既機會。好老實講，比起以前，今年D時間真系好浪費，我畢業到依家，從來都未放過咁耐假，每一次都系一份接一份，永遠都唔識比時間自己休息。

2006年可以話系我人生既轉接期，通常行大路之前都要經過一段好亂既時期，系尼段時期，你不段摸索，清楚了解自己想要D咩，往後既路要點行﹐你唔試你唔知，但系通常都唔會一試就OK，所以只可以見步行步，尼段時間系最難過，尤其對D從來都唔比自己行差踏錯既處女座尼講，要經歷咁多失敗個案，真系好辛苦。

但系.....我好興幸自己咁勇於嘗試咁多嘢，就算失敗左都願意再試，雖然今年我每一份工都唔系做左好耐，但系好老實講，我每份工都比平常人出多200%既力去做，去學，所以我識到好多唔同既野，零售業、時裝界，一D我從來未接觸過既行業，加上我之前做過半年沙煲瓦礫，令到我變成一個All-rounded既人，尼個亦都系我老細揀我既其中一個原因。

我真系好想同大家講，任何一份工，都有佢有用之處，只要你比心機做，比心機學，你一定會得到一D嘢，多與少視乎你付出幾多，好多時，D年青人只會做老細比佢做既嘢，唔會行多一步，做多一點點，亦唔會諗吓點樣將件工作做得更好、點樣可以將件工作更快完成。其實有時工作唔系要表現比老細睇，而系要令自己進步，要同自己交代，唔可以平平凡凡就過一日，要令自己每一日都有進帳，咁先唔會令自己每一日系白過。而且，你唔會知道，你今日遇到既人，將來對你會有咩影響，所以你每一日都要系作戰狀態，比人有一個好印象。

好開心2006年可以同到爸爸媽媽去旅行﹗
好開心2006年可以同成家人去北海道旅行﹗
好開心遇到一個好鍚我既人﹗多謝你﹗
多謝一直陪住我既長輩、朋友﹗
祝大家2007年身體健康、每日都開開心心﹗