老朋友

上年系一個好難過既一年，好忙，好沮喪，所以好少同D朋友見面。

好多朋友都會覺得我舊年系忙拍拖同結婚，但其實..... 系工作令到我失踪。除左好多野做之外，工作上既打擊，令到我害怕見人，成日都想哩埋，唔想見人。久而久之，以前活潑可愛既我唔見左。

近日放下手頭上既工作之後，終於有時間見番D老朋友。近兩日同兩個識左好多年既朋友單獨食飯，傾左好多好多，好感動。大家既感情唔會因為見面少左而改變，以前同佢地每個星期都會見一次，每次都會好多野傾﹗但過去一年，我地一次單獨食飯都冇，又冇傾偈﹗舊年大家都為一D不幸事而忙，我爸爸有時啦﹗另一個朋友家姐有事啦﹗

其實我真系覺得好對唔住我朋友，佢家姐有事系佢最需要人支持既時候，我又玩自閉，我冇出過咩力，我真系好內疚。不過我好開心，佢依家終於放開左，又搵到一個好好既女朋友，我好戥佢開心。

我發覺，人真系要失去過，先識得珍惜自己擁有既野，我同兩位朋友都失去過自己既親人，好感受到家人系幾咁重要，平時大家都話工作好忙，冇時間陪屋企人，但..... 生命系可以系一瞬間失去，所以要珍惜擁有親人既每一日，要好好愛護佢地﹗失去左後悔都冇用。其實人生在世為咩呢？只要可以開開心心生活咁咪得囉﹗以前太過著緊自己既事業，但系都唔開心，咁不如放開D，放多D時間系家人，朋友身上仲好。同佢地兩個傾完偈之後發覺我系一個好需要見到朋友既人，關心朋友會令到我好開心，尼種滿足感系系工作上搵唔到既﹗而且，尼個世上，仲可以有一D知已系咩都講得，真系好難得，好感恩。

好得意既一件事系兩個老朋友不約而且話我變左好多，佢地兩個都覺得我變得隨和同體諒別人，冇以前咁大脾氣﹗其實我開頭唔鐘意自己變成咁架，因為覺得以前既我好似自信心高D，開朗D，好有自己既主見好似型D，依家變得隨和咩都冇所謂好似唔型咁，冇左自己既Character咁，但兩個老朋友都話我依家既改變令我走餘下既路舒服D，起碼會多左人鐘意我。(乜...以前好多人唔妥我既咩???) 如果尼個改變系好既話，我要多謝六號仔既潛移默化先得啦﹗

我真系好希望兩位朋友可以得到幸福﹗希望我地既友誼不變﹗