親密關係

上回講到，我地已經進入左一個Intimacy既關係，好覺得喎，依家我地幾個拍拖拍得好甜蜜呀﹗

話說上星期日，我地一齊去左旅行，回程時，我地傾計傾到唔捨得走，supposed我系要系xx站落車，本來我都已經落左車架啦，但系系車門關上之際，當娜彈左一句 "不如你陪我地搭到旺角先啦"，就系為左佢一句，我就走番上車，再開開心心傾過啦﹗哈哈哈哈，好攪笑，我地傾到去旺角，出閘後，我同亞之姑娘又唔捨得分手，佢陪我去搭小巴，去到小巴站，我又唔捨得，再送番佢轉頭，就系咁... 我地來回行左兩次彌敦道，先分手。

親密關係就系咁架啦﹗成日都想見到對方，好多野想同對方分享，我依家享受緊拍拖既感覺﹗哈哈哈哈﹗

PP

餐蛋丁

嘩嘩嘩﹗上個星期六，系屋企食早餐，千年都冇試過啦﹗心血來潮想食餐蛋丁，所以自己親手煮。
嗱嗱嗱﹗煮一碗好味既餐蛋丁系好難架，由於本人出晒名食得慢，所以如果D丁煮到岩岩熟就弊啦﹗我食唔夠兩啖，D丁就林晒，所以一定系要煮到半生熟先得，煮丁系要冷水落麵，水一滾就食得啦，熱水落冇咁好味架，試下呀 =P 煮麵期間就要煎定餐肉同蛋架啦﹗唔系D丁得時，其他未得就林晒架啦﹗餐肉要切薄片，煎都兩面都脆，本來太陽蛋就最好，但系由於我從不食蛋黃，所以迫住要煎熟蛋。(寫寫吓都流口水)﹗再落埋原味丁個包麻油，咁樣一碗美味既丁就完成啦﹗

個朝早，我煮完碗丁出尼之後，嚇親大胡生同胡太，佢地兩個一見到就"嘩﹗"一聲，驚訝到個口幾大呀，話..."亞女，你食公仔麵呀？" 亞胡太仲要加一句 "仲要加餐肉添呀？" 哈哈哈哈﹗好攪笑﹗我好明白佢地既，平時亞皇帝女食野清淡到冇人有，今日真系好唔妥，好唔妥﹗哈哈哈哈﹗
但系真系好好味架﹗=P

感動的一晚

上星期六，2月11日，一個令人感動的晚上。

我地上星期去左當娜屋企拜年兼慶祝二月份當娜同Dorcas既生日，我地一如以往，閒話家常，食餐飯，切吓蛋糕，之後諗住番番去當娜屋企攪埋個禮物贈送儀式後就閃，點知，送完禮物之後，我地傾起心事呢..........我地大家系一個熄左燈既環境底下，傾下大家系2006年既大計，我聽到最開心既大計系.....當娜同泰迪決定今年生BB, 實在系一個令人雀躍萬分既消息呀﹗
傾完大家既大計之後.....我地竟然傾到大家既缺點，首先各人講番自己既缺點先，然後再由朋友講番佢地睇到既缺點，大家都坦蕩蕩咁講出大家既意見，當中不乏感動場面。
真系有所不知，當娜同泰迪--尼一對模範夫妻(the best couple I have met in my life up to now) 原來都經歷過離婚既危機，佢地由中學時期拍拖，拍左7年，結左婚8年，由我地識佢地個一日開始，就覺得佢地好相敬如賓，次次當娜提起泰迪呢，我地就會比佢地冧既故事沉死，估到估唔到佢地曾經有一段好唔開心既日子，兩個人經過一段接受輔導既日子，先至可以變成依家人前人後都咁恩愛既夫妻。原來當娜同泰迪以前次次見面都會鬧交，仲要鬧得好勁個隻，後來發覺真系冇辨法再系埋一齊，決定離婚前，當娜去見社工，佢地每一次見完社工之後，都會覺得好內疚，因為大家當發脾氣既時候，系唔會覺得自己唔啱架，其實雙方都有責任，當佢地知道左之後，就努力去為對方改變，並互相體諒對方，所以依家，失而復得，大家都好珍惜對方。
我以前年少氣盛，成日都發脾氣，覺得合則來，不合則去，從來無諗過去補救，只要求別人為自己而改變，其實好多時，各人行多一步，已經可以解決到好多問題，從而....我發覺到我失去左好多，好多人系可以挽留既，我無挽留。
不過，尼幾年，經歷過人生既低潮期，但願我已學懂珍惜，已學懂去付出，已學懂去遷就，唔會再比機會流失，唔會再比自己後悔啦﹗
經過個晚之後，大家對大家既了解加深左好多，之之姑娘話系社工界既term叫Intimacy，我地進入左一段親密既關係，系尼個咁複雜既社會裏面，到左我地尼D咁既年齡，仲可以識到一班交心既朋友，真系極之難得，我會更加珍惜佢地每一個，You all are the treasure of my life!! 愛你地﹗
PS: 多謝你地一直包容PP既霸道。

2月13日的特別鳴謝

依家系零晨4點15分.......連續第三晚失眠.... 好痛苦
特別鳴謝：之之姑娘捱眼瞓陪我嗲左個幾鐘

皇家御用紙巾

我鐘意系我樓下個間報紙當買雜誌，因為買雜誌就會送一包正版既Tempo紙巾，尋日落樓下買雜誌既時候，佢送左包 Jasmine味既Tempo紙巾比我，我一用....就愛上左。正

佢每一張紙巾都散發著清幽既茉莉花香味，久久不散，真系好愛。

系尼度，要同各位親愛的講..... 以後同公主出街，一定要用皇家御用紙巾--- 正版Jasmine味既Tempo紙巾﹗

發完噏風啦﹗=P

很有意思

再見悲哀 - 林憶蓮
作曲／監製：Eric Kwok 填詞：林夕 編曲：Eric Kwok／Ted Lo

*再見悲哀因我不再計較任何結果 　甚麼都可以坦蕩未在乎誰是錯 　
我兩眼合上失去甚麼　是與非也掠過 　別固執到問一切為何 　
再見傷感因我不易被淚流留住我 　甚麼的境界都愛自自然地渡過 　
去到最尾就如與物忘我　回復身心最初 　面對心鏡內一片平和 　
鳥聲瞬間閃過　(這麼最好不過)*

除了心　只有心　可以解心鎖 煩惱多　因我要得多
微似砂　輕似煙　怎會有風波 有惆悵　跌入了恆河
情路太彎　過就過　當是個經過 感動的愛　當做一次砌磋
沿途上遇上甚麼　都欣賞過 投入時便快樂一起過

Repeat *

傻也好　痴也好　因你記得多 忘記的　比你記的多
懷念最好　我便會　繼續愛惜我 花瓣飄過　
美在不顧結果 人存活在世就似沙粒飛過 誰又曾為了誰褒貶過

PS: 唔捨得收線系一種幸福，要開始習慣搭船都系一種幸福﹗

我太愛胡太啦!!!!!!!!!!

胡太：我愛你﹗你實在系一個好媽媽﹗愛你愛你愛你﹗

今日會去噹娜屋企，由於噹娜唔比我地買野上去比佢，所以我就提議整底蘿蔔糕比佢做禮物，我之前同過胡太(系咁綺)講過，胡太就一口答應啦，點知尋日有個auntie就打比我媽咪話今朝可以上去佢間廠度幫我做褲，我就話，唔緊要啦，叫佢唔洗整蘿蔔糕啦，我買生果上去咪得囉，怕佢太辛苦，點知今朝早，平時懶訓既胡太，晨早8點就起身，去街巿，然後番尼整蘿蔔糕，整到十點幾然後又去幫我做褲，佢實在太好啦﹗佢為左滿足我兩個願望，而咁辛苦，我真系好感動呀﹗

媽咪：我愛你呀﹗我要對你好D。(用心啦，家用唔可以再加架啦﹗) =P

我的名字叫Ms.Q

好開心好開心，今日收到你兩個email，破左每日一個既紀錄，系咪因為你知道我病先寫多個呢？如果日日你都send幾個email比我就好lu。(我鐘意收email同msg，唔該呀﹗) =P

Ms.Q=Ms.Question or Ms.Cute (n_n)

平時你系一個英文人，但系今日見你打左6個中文字，我覺得好好笑，同埋我諗我既記憶冇你咁好囉，幾時邊個場合你都記得﹗我應輸啦﹗

PS1. what a special feeling by using "my" and "your" =) ha!!
PS2. I love the subject: Daily Report-Feb9 (Extra). Any Extra-2?? =)
PS3. I'm feeling better after getting the "Extra" la... Don't worry!

可憐的我

尋晚已經胃痛，今朝一早就走去睇醫生，睇完醫生就彭彭聲番屋企做野，今日好多事要處理，點知，當病到死死吓既時候，仲要比大陸廠既同事激得半死，一激親呢.... 唉，頭又痛啦﹗好可憐呀﹗唔開心 =(

名份

男/女朋友、老公/老婆，
尼D名份好似好沉重咁。
名份背後系一個責任，系一種壓力。

你地唔知發唔發覺呢﹗做朋友時就好好地，大家可以互相包容，
做左男、女朋友之後呢，大家就會好容易發對方脾氣，
同居多年既情侶相處好好地，但系一旦結左婚，大家就會成日鬧交，到最後甚至離婚添。
點解呢？
問題好多時都源自名份，當大家有左名份之後，大家就要負上名份上應有既責任，而雙方都會對大家有expectation，仲會系愈來愈高添︳咁就麻煩啦﹗鬧交會愈來愈頻密，關係會愈來愈差....到最後..... 冇眼睇.....

所以有時....冇名份好似好D，大家系冇壓力既環境底下交往會更好。如果不能一起終老，一張婚紙又有咩意思呀﹗

PS: 雖然我下星期有三日要開會，但都希望大家就到時間食飯啦﹗sorry呀﹗(點解你唔覆我msg架﹗)

開心的新年假期

今年新年有成9日假，本來都好擔心D日子點過，但系好好彩，冇悶到，已經心足﹗

28系屋企做左一日傭工，夜晚就同左糖糖同之之姑娘去左SOHO飲野傾計，好開心呀﹗好老實講，自從同糖糖分開左team之後，我地真系少左好多時間一齊，所以我05年尾既disaster佢都未有機會update，所以個日一次過update佢，我地仲傾左好多野，好開心﹗令我回想起我地上年成日一齊傾計既日子，好舒服﹗
29初一上晝食齋、然後去左婆婆度拜年，比抽獎個部相機激死，然後就去左唱K，睇Narnia再食飯，嘩﹗節目勁豐富，套戲又冇悶場，笑﹗
30初二一早起身，見到媽咪整緊開年飯，我一入廚房就發脾氣啦﹗事源亞胡太又犯同一個錯就系開年飯冇買魚比我食，激死我，本人已經唔食飯、蝦、雞同燒肉架啦，連魚都唔買比我食，即系要我齋食菜啦﹗好嬲咁就落左樓下跑步，誰不知，跑完步番屋企之後，見到一條好靚既石班魚，好開心，原來亞大胡生聽到我發爛渣之後，彭彭聲落樓下百佳買，嘻嘻﹗(皇帝女冇計)，食完飯之後就嗱嗱臨閃，因為費事見到姑姐，問埋一D唔識答既問題。之後入左南丫島行山，系沙灘度晒太陽，好舒服，之後番出尼，本來打算除消睇煙花，怕多人，點知我地求祈搵左間餐廳食飯，竟然系可以睇到煙花既﹗嘩﹗開心到不得了，真系船到橋頭自然直。
31初三就青商一年一度新春大團拜，好好玩，雖然D利是既quality麻麻地，但都ok多封啦﹗最開心被人recognize﹗
1-3就陪亞姨&胡太番大陸玩，由於初三已經唔舒服，所以番到去，都冇乜點玩，而且我乜都唔食，所以番去只系做苦力同訓，但我一D都唔覺得悶，好奇怪，夜晚佢地出去玩，食飯，我就留系屋企自己食野、睇電視，好舒服好開心，兩晚我共訓左24小時，系香港一個星期都唔知訓唔訓到咁多。
4號就去左我亞親屋企，陪佐治打麻雀，真系世事難料，竟然最後勝利者系來自德國既佐治﹗個三個中國人真系好鬼冇用。唉﹗
5號就去左個Auntie屋企拜年，好開心好感動，我11年前認識尼個auntie，最初幾年，我都系收佢兩封利是，自從佢同uncle分開左之後，就變為一封利是，我亦都冇再見過uncle啦，但今年，我系auntie手中再次收到兩封利是，我亦都見番uncle，真系好開心好開心，我衷心祝福佢地兩個白頭到老﹗

PS: 今日收到你既email好開心，因為我都冇再send email比你啦﹗hehe!!