我是一條賤骨頭

近日真系放晒假，咩都唔洗做 (JC)，初初個幾日都好開心架，因為真系想休息吓，但系近尼兩日，嘩﹗Down到不得了，我最後既結論系---我是一條賤骨頭。唉﹗﹗

其實近日公司好多野做，因為近年尾，咩都要系農曆新年前做晒，所以會忙，但系比起之前，又要忙JC野又要忙公司野，近日算系比較得閒架啦﹗但系我尼D人，身在福中不知福，得閒D，心情就Down晒﹗真系唔掂﹗

PS: 質生病左，希望佢快D好番啦﹗唔系今個星期就做唔到職業球員架啦﹗

冷戰比鬧交更傷感情

以前後生既時候，脾氣比較暴躁，一唔開心就亂發脾氣，後來不幸患上偏頭痛，唔發得脾氣 (因為一激動少少就會頭痛)，所以就算勁嬲，都要立即收埋自己，唔鬧得交；近尼幾年，人愈來愈大，就愈來愈唔鐘意嘈，所以更加唔鐘意鬧交，寧願算算算，收埋自己唔開心，唔出聲，自閉，所以我成日都覺得好對唔住以前既人，依家識我既人會比較幸福，因為我已經可以(有限地)控制到自己既情緒。

但系有時冷戰仲辛苦過鬧交，可能我既月亮星座系天秤座既關系，愛好和平，和諧既關係，所以一遇到同人有唔同意見既時候，我就好唔開心架啦﹗(可能自己又比較霸道啦﹗)，要用上千萬倍既力量去compromise，但系當兩個都各恃己見既時候，慘啦﹗我就受罪啦﹗我個心會梗住梗住，好唔開心，唔開心唔系因為"咬"唔贏件事，而系大家好似傷害左感情咁，大家有少少冷戰feel，但又要扮冇野，個種感覺系最難受，對我簡直系煎熬。

所以各位我敬愛既長輩、各位朋友，如果你地對我有咩意見，或者我有咩令到你地唔開心，請你地要坦誠同我傾，同我講，我希望大家可以系一個和諧既環境底下，開開心心一齊玩。我好珍惜我身邊每一個朋友，我唔想大家有心病而導致關係疏離。你明白嗎？

1週年紀念

好開心呀﹗尋晚我同我上年12月個班OC慶祝我地相識一週年紀念，另有7位嘉賓到場祝賀，多謝晒﹗

相識非偶然，依家尼個年代，真系好難得可以遇到一班知心友，佢地真系對我好好，我自問系一個比較霸道既人，雖然我會對我身邊既朋友好好，但好多時我都要人遷就我，佢地對我既包容，真系非常感激。
我地五個第一次正式見面系2004年11月14日，系亞C公司開第一次12月MFG X'mas P既OC會，第一次見面，覺得糖糖好惡，覺得之姑好細路女，覺得噹娜好叻(因為佢比我地幾做做多一個project，會比較有經驗)，覺得亞顛傻吓傻吓 (因為佢唔夠瞓個樣就好....!!!)，之後，亞C叫我地揀post, 我系最後個個揀，糖糖當時又未尼，所以我矇查查就做左Chairman啦﹗之後開多幾次會，發現噹娜系超級可愛，咩事都冇所謂，系一個好善良既女仔....但系你估到估唔到，佢已經有個拍左好多年拖，然後又結左好多年婚既老公......嘩﹗真系估到估唔到呀﹗後來識埋佢老公泰迪先至明白到，點解亞當娜嫁左咁多年仲系咁少女feel，泰迪真系功不可沒。所以我地專稱尼位少女為幸福小師奶，因為佢真系好令人羨慕。而之前比我覺得傻吓傻吓既亞顛，原來佢系一個好聰明，好有主見既女仔，而之姑呢.... 爛玩到爆，一d都唔似社工，亞糖糖就依然系惡囉...... 但系佢做左個份checklist出尼...我真系嘆為觀止喎，佢系一個做野好仔細既人，好叻﹗

MFG完左之後，大家都仲keep住聯絡，好開心，我地好多時都可以tea足4,5個鐘，不停系咁講系咁講，大家好似識左好耐好耐既朋友咁，我地好似永遠都有講唔完既話題咁，3月既時候，我地又原班人馬做左個大型project, 當時其實做得唔系好開心，有一次同完亞車亞文開完會之後，勁唔開心，勁嬲，就打比糖糖，點知佢即刻系屋企出尼陪我，聽我發盧蘇，真系勁感動，我、之姑同亞糖糖三條友咁又傾左成4個鐘先梗番屋企。朋友多唔一定好幸福，但當你有需要既時候，D朋友會義不容辭咁出尼陪你，幫你咁就真系幸福啦...我知道我系一個好幸福既人﹗好多謝你地。

經過個次之後先發現，原來糖糖都唔系想像中咁惡既，佢都擁有巨蟹座既優良特質既--就系會好關心好care身邊朋友既人，雖然佢平時既表現好強，但系當你嗲下佢呢，佢就會受唔住，唔會做說客的一週架啦﹗hahah!!

5月時我地三條友去左澳門ASPAC，真系好好玩囉，三條友一間房，發生左好多好攪笑既場面，其實尼個組合都幾好架，糖糖會為我地安排晒所有野，之姑就陪我玩，嘩﹗我咩都唔洗諗唔洗做，不知幾爽呀﹗個次旅行，系我人生之中瞓得最少既旅行，日日都系瞓得3-4個鐘，但系一D都唔攰喎，因為每日都過得好開心。

我地做完個MC Competition，再加埋E-bid既disaster之後，好似大家一齊經歷左好多好多咁，個感覺好close，互相扶持，尼d真摰既感情，系出左尼做野之後，都冇機會遇到lu。

所以呢.... 我會好珍惜同佢地既緣份，雖然噹娜同亞顛好忙，但系我會唔嫌煩，系咁出email比佢地，update我地既情況同埋活動，希望佢地間唔時都可以分配到叮叮時間比我啦﹗

各位好姐妹，好多謝你地﹗我真系好幸運可以識到你地，同你地做朋友，我好希望，我地既友誼永固﹗

PP 上

靚左既Vivi+擔心死+愛倩問題

尋日亞Vivi話要去蒲，所以我特登帶左D化妝品番公司幫佢化妝，等佢靚靚咁去...蒲....佢尋日先發現到Mascara既利害，隻眼突然大左....(緃使佢自己claim自己隻眼大....)

尋晚收到德國既恐怖短訊，我亞親系德國迷路，佢又唔系好行得，又唔識講德文，又凍，又餓.,..... 擔心死我﹗好心佢就唔好拿住個地圖就周圍去啦，最後攪到亞佐治要去接佢，唉!!! 唔見左個女，我都唔知點同亞黃太交代呀﹗親﹗唔該你﹗..... 乖乖地做跟得夫人好啦﹗下次先扮熟路啦﹗唔該﹗

尋日同亞冼生見面，發覺佢真系殘左好多，其實拍拖既日子理應系面上發光，好開心既樣，但系見佢.... 唔系囉﹐仲要系愁個隻，唉!! 真系有D擔心﹗

其實我都唔系好清楚....感情系可以培養，但系愛情又系咪可以呢？如果愛情系唔可以培養，咁咪即系每對情侣都要一見鐘情囉？但事實又好似唔系喎，所以我都唔系好知.... 如果開始時唔系話好鐘意對方.....咁仲好唔好繼續呢？要比幾多時間去研究/培養呢？如果系繼續....到最後發覺唔得.... 咁又好似拖住個女仔囉.....好難答....

買衫記----大出血

大獲......唔得掂....放假後遺症......經過瘋狂購物三日三夜之後.....真系要停手啦.........唔得掂呀﹗
我依家好相信D減肥專家所講，系減肥期間，千祈唔好抑壓自己去唔食某種食物，因為當你抑壓得太緊要，你忍唔到既時候，就會系咁瘋狂咁食，咁反而有反效果。
所以尼.....平時.....系咁依...得閒又買下衫....唔得閒都買下衫.....咁.....就唔洗因為抑壓得太耐.....而瘋狂咁買啦﹗
所以我會由今日開始適可而止咁間唔時咁買下衫架啦﹗ 哈哈哈哈哈!

Election...then....Holidays!!!

Election已經系上星期六完滿結束啦﹗之姑、糖糖同我成功地選到成為BOD members啦﹗恭喜﹗

系尼度，好多謝我契爸爸幫我修改份election speech，亦都好多謝各方好友既支持。其實本來我為左選舉都有少少緊張既，但系當選舉既時候，一d緊張都冇，當我仲要系場外等選既時候，我都冇再睇我份講穚，仲要同其實人傾計，D人會覺得我好輕鬆，但系我只覺得Election只系一個show囉，無咩特別需要緊張，可以講系有少少去到無咩特別感覺既地步，因為選到都冇特別開心，只會為完成晒今年既projects而開心囉﹗因為尼幾個月真系太辛苦啦﹗

完左之後，就同左班朋友去鯉景灣食飯，食完就去食糖水，好開心好開心，因為我地好耐都冇坐低一齊食飯傾計啦﹗感覺好warm，好舒服﹗

星期日同完家人飲茶之後，就進入瘋狂購物既時間啦﹗嘩﹗悠閒到爆.....當你三個月活著系忙碌之中，你先會發現......悠閒原來系一種奢侈品﹗

我的小熊Philipp

你好嗎？我叫Philipp呀﹗系由德國飛尼香港為Susi打氣架﹗

嘩﹗今朝勁開心呀﹗一朝早就收到由德國寄尼既包裹，系我德國一個朋友寄比我架，佢知道我今日會選VP，所以特登寄隻熊仔比我為我打氣架﹗而且，時間啱啱好﹗好開心呀﹗鍚晒你﹗

不過好攪笑喎﹗亞菲臘有好多朋友仔過喎，而佢其中兩位朋友, Brown Cow & White Cow呢，我系四年前已經擁有架啦﹗系我一個瑞士朋友送比我架﹗所以依家引起左我收集尼系列動物公仔既興趣﹗=) 不過尼，Vivi話我知其實香港都有得買架﹗但系我一直都唔知囉..... 不過....我一定唔會自己買比自己架，因為公仔尼D野要人送先得架嘛...... 嘻嘻﹗朋友們....你地收唔收到呀??? =P

另：Vivi依家收集緊OK便利店既Miffy公仔.....煩請各界好友....如果你地系OK買野，而又唔要個D公仔既話，請你慷慨解囊，送比我地咁Q既Vivi啦﹗熱線電話：9xxxxxx

I'm too little

世界上面有好多人，以前唔知系咪我個世界比較細呢，我總覺得自已好叻，但當人愈來愈大，見既人愈來愈多既時候，就會發覺........自己原來系咁渺小。

以前總會覺得比人早一步升到職，好叻好開心，但系你又系咪真系有料去做呢？一埋位就知道。其實當你系某個位既時候，老細唔會再教你任何野，你只可以系GIVE, NO TAKE!! 無疑，你可以從經驗中學習，但系當你升到某個位既時候，老細系唔再容許你有任何出錯，所以你唔可以再從錯誤中學習，而你既知識水平就永遠只會維持系你升職之時既水平。

另：比你早人一步得到一個好男人或好女人咁又點呢？好多人系年青既時候，都系比較貪玩，對將來好有憧憬，枉枉唔識珍惜自己所擁有既野，所以好多青梅竹馬既男女朋友都經唔起時間同外間引誘既考驗而分手。反而有好多好遲先開始拍拖既人，佢地可以一拍就天長地久。

<快>未必系好，<遲>同<慢>亦未必系唔好，你依家事業未有成，唔代表唔好，因為上天系比緊時間你做足準備，等你既機會一到時可以得心應手。你未遇到<佢>，系因為上天覺得你仲未配得上<佢>，<佢>系世上最好既，上天只會安排<佢>系你學懂珍惜既時候先出現，等你可以同佢白頭到老。

<等待>是幸福的﹗只要你地唔好放棄，不斷努力，保持正面思想，你將來所得到既一定會更多更好。

十大傑青服務日

尋日做左十大傑青社會服務日既MC，好感謝D朋友咁支持，因為佢地為左請假不突止，最重點系為我而早起身，真感動得要死，容我系尼度鳴謝以下單位：
1.糖糖2.T3.質生4.戚生5.之姑 (另加我MC Partner：吳生)
尋日朝早，本來個天黑monkmonk，點知一出場就晒都隻野咁，不過算啦，諗住塊面都搽左防晒唔洗驚啦，點知............嗚.....嗚........嗚........嗚......條頸唔記得搽，番到屋企沖涼時一睇，嘩﹗條頸兩截色，真系想喊.............好肉酸﹗唉﹗真失策﹗依家都唔知點見人.........要勁帶頸巾先得啦﹗
遲D等亞戚生攪掂D相之後就send比大家睇啦﹗
註：開始發覺.....做MC做到麻目左，我諗要停一停先得啦﹗
另：尋日同亞T扮做神探，攪到D尖沙咀警署既亞Sir，真系唔好意思啦﹗嘻嘻﹗

大食會+今天的傷勢

上星期六真系好難得好難得，我十幾廿年無煮過野食，上星期就請左一班好友上尼做白老鼠，大家食完之後，今日好似都仲活系世上，咁我諗都OK呱﹗哈﹗
唔好講笑，尼餐野真系攪左好耐，我亦都高估左D朋友既食量，唯獨亞之姑系雞翼個PART冇令大家跌眼鏡之外，其他朋友都好"削"吓，下次都唔洗攪咁多野。(不過聽聞個日D朋友下畫食完我個餐之後，成日都無再食過野，飽到......) =)
個日自己唔小心比個焗爐燙傷，搽左燙火膏之後，今日已經唔痛啦﹗各位唔洗擔心，附上今日傷口相一張﹗
希望各位都鐘意我個日整既野食啦﹗
下期預告：系打邊爐呀﹗
鳴謝：超級抵鍚既胡媽媽、三文魚供應商質生

愛上德國吧﹗

我好開心好開心呀﹗T小姐終於接受左G先生既邀請去德國啦﹗勁開心呀﹗當我收到尼個消息既一刻，我真系好想喊﹗實在太感動啦﹗無白費到我尼個星期晚晚同佢地兩位輔導到零晨既努力呀。
(勁眼瞓)

T﹗你知嘛﹗其實德國唔系你想像中咁悶，咁可怕架﹗尼次系一個好好既機會，比你認識下佢，我絕對相信，以你開朗既性格，你去到德國一定會識到更多朋友，你會搵到好多野可以做，系唔會悶架﹗當然，你開始既時候，一定會感到陌生同唔習慣，但你慢慢會發覺德國系一個寧靜中有熱鬧、乾淨(啱潔癖既我﹗嘻嘻﹗)、先進、環保，德國人純樸真誠友善，真系好好架﹗ 最重要既系.... 有亞G先生陪你，

**當你所愛既人同你系個個地方生活，個個地方就會變得可愛架啦﹗**

你信我呀﹗我所為你做既都系想你得到幸福快樂。我鬧你，都系想你好咋﹗
G先生從來冇諗過迫你，佢只系想表示佢既誠意比你睇咋，佢一直都好在乎你既感受，佢真系好好﹗好到我都唔知你可以有咩藉口拒絕佢﹗
再一次祝福你﹗我的親﹗我永遠都會系你倆身邊支持你地架﹗

PS：我已經諗定左你地個婚禮系點架啦﹗我連MC Script都諗埋，你冇理由唔比我玩架？rite﹗

願我每一個朋友都可以幸福快樂﹗^.^

我愛媽媽

今日心情唔知點咁，好攰，咩都唔想做，每日起身都發覺好似好多野要做咁，比著以前既我，我會好開心，因為我好鐘意做野，但系唔知系咪人老左尼，好多時都想休息下，靜下，尋日番到屋企見到媽咪，覺得佢老左好多， 好想多D時間陪下佢，但系我又無時間，與其話無時間，不如話自己無放家庭系第一位先啱，我都覺得自己好唔啱，唉!!

其實我好鐘意我媽咪，我覺得佢好好，以前成日覺得佢好惡，但系依家既佢，已經變成一個好可愛既小朋友，好得人鐘意。佢有好多野都值得我地去學習，佢系一個好有毅力既人，又唔怕辛苦，佢又聰明又能幹，佢系一個勁好既上師，從來對人都唔斤斤計較，佢既下屬冇一個唔鐘意佢，你要明白，佢有成千個下屬，管都已經難，要得到人心更難，所以我成日都覺得，系事業上面，我一世都唔會好似佢咁成功。

但系系人際關係上，我會比佢更多人鍚囉﹗嘻嘻﹗因為我系佢75%惡，101%孝順，最緊要系200%可愛囉﹗=) 所以佢都好proud of 有個咁好既女架﹗

各位朋友，希望你地多D時間陪下D家人啦﹗家人永遠都系最鍚你架﹗

Tonite I Celebrate My Love For You

Tonite I Celebrate My Love For You

其實之前睇過好多文章，都教人要珍惜眼前人， 但系人永遠都系咁自大，成日都會覺得我下個男朋友/女朋友一定會好過依家個個，所以讓一個又一個咁系自己生命裏面流走，但最後先發現....原來之前個個已經好好，後悔已經太遲啦﹗

你揀人，人揀你，要取一個平衡點，比你得到最好，你會懷疑對方點解會看上你，唔好，你又會嫌棄人，所以Best Couples唔系咁易搵到，遇到一個鐘意你既人，而你又鐘意既系好難架啦﹗可能你會覺得自己既質素好好，應該可以得到個更好既，咁等都幾時呢？機會無左就無，人地亦都唔會等你。對每個人都要公平一D。

當選擇左同佢一齊之後，就唔好諗得太多，投入去愛，結果雖然無人能預測，但我相信，當你投入去愛一個人既時候，你會得到更多。太過保護自己只會令你無法享受愛情。愛情系唔會有Schedule架，佢要尼就尼，以前你睇得好清楚先同一個人發展，到最後都可能系分手收場，所以發展得快未必代表唔好，只系另一個方式既愛情啫﹗
世界上系無FreeLunch既，你要付出先有收獲，你唔行出一步你系唔會知道，原來愛情可以系咁發生架﹗

T小姐，我祝福你，G先生同你都系我既好朋友，我真系好希望你可以得到幸福，而我好相信，佢系可以比到你一生幸福既人﹗嘗試放開自己，去享受一下愛情啦﹗

PS. 各位暫時無男/女朋友既好友，你地唔好灰心，依家無，唔代表你地唔好，只系你地要求高咋﹗哈哈哈哈哈哈﹗

考完試去玩﹗Halloween

尋晚考完試之後，去左諾士佛台玩，雖然無蘭桂坊咁多人，但系我地成班人自得其樂﹗=)
最難得系，亞之姑系百忙之中抽空尼陪我玩﹗亞琳琳個死人咀.....確系驚嚇，加上佢跳跳吓舞，頂我唔順，叫我去死個一幕，簡直系爆笑囉﹗仲有亞戚生個彊屍Look(配眼鏡喎﹗)得到不得了，總之就勁好玩啦﹗

PS. 我睇下可唔可以攞到亞戚生既Permi，刊登佢張肖臉系度先﹗哈哈﹗

今日好開心

今日開始寫尼個web，系因為今日勁開心，經過一個星期忙到嘔既非人生活之後，我終於可以番尼公司，見下我D至愛朋友啦﹗雖然今晚要考試(仲要未溫晒)，仲有好多野未交未做，但系心情依然好好，朋友就系可以令到自己開心既靈藥。

1. 好開心，因為上星期系World Congress攞獎﹗
2. 好開心，因為今日終於番到公司同朋友傾偈﹗
3. 好開心，因為Joseph幫我同我D同事影左幾張好樣衰既相﹗哈﹗
4. 好開心，因為我最好既朋友老Ed終於拍拖啦﹗
5. 好開心，因為林先生番左尼香港﹗
6. 好開心，因為今晚系Halloween，有得玩﹗
7. 好開心，因為今日糖糖約我去晒太陽﹗
8. 好開心，因為我同事VivianDraft剪左個頭，冇想像中咁醜﹗呵呵呵呵﹗
9. 好開心，因為今日史先生唔系香港，可以溫書﹗嘩嘩嘩﹗開心得不得了﹗
10. 好開心，因為.........心情好囉﹗嘻嘻﹗